Pangea

Quando gò fatto 24 anni me ricordo ........niente .

Troppo tempo e anche troppi compleanni xè passai da quella volta per podèr dìr .....indò che iero.

Però mè ricordo che fino ai 27 , de solito festeggiavo con la compagnia in qualche local zercando de svodàr più biceri de quel che podessi esser lecito , ....pessima abitudine !

Orbene , oggi xè el compleanno de Antonio , ns mentore , amministrator , muiesàn e assenteista .

Per celebràr el suo ventiquattresimo anno d'età , andemo tutti a beverse una birra virtuale in Taverna della Dreher.





Auguri !

Pensè che mi ala Drehre go rivà anche sonar ..
E co iero più picio, in giardin, go zercà bira fora de un stival.
Che bel che iera la Dreher.

Ve ringrazio de cuor a tuti per gli auguri e Ciacio te ga avudo una belisima idea de andar alla Dreher!!! Ahahah eh si ammetto anche de esser sai assenteista

P.S. Che fine ga fatto sta birreria? Go avudo sempre sta curiosità ma nessun mai me ga savù dar risposta!

Credo che sìa stà l’estate del 1972 o '73 quando, sul suggerimento de chissà chi , mi e Sandro ( non el Sandro che scrivi sul Forum , anche se i iera altissimi tutti due !) sé gavemo presentà alla Dreher in zerca de lavor .

Uno con la vespa Primavera e quel più massiccio ( Sandro al Nautico iera conossù come 'Orso' ) con un Benelli rosso , tutti e due col problema de reperir i contanti per la benzina e portàr in giro le morose de quella volta , una mora e una bionda.


A quei tempi le famiglie ne passava una paghetta de circa quattrocento - cinquecento lire al giorno e noi zercavimo de farserli bastàr ma iera giusto… per la sopravvivenza.


Dunque , incontremo el vice-vice-vice direttor della fabbrica nell’atrio


, e questo nè spedissi direttamente da un altro direttor , quel che gestiva la birreria …..el locàl ..insomma .

Alti e bellissimi ( Sandro iera più alto ma anche meno bèl ! ) gavèmo subito fatto colpo e semo stài assunti con la qualifica de aiuto-camerieri con un contratto fino a …chissè ricorda , comunque semo stài là dentro per più de due mesi .
Con noi iera altri due muli , uno che andava al Volta e uno che fazzeva l'aiuto per mestier.


Sinceramente non me sovvièn a quanto ammontava la paga , però.. i soldini non né mancava.




Inizio alle ore 17 in punto , zà vestidi con le braghe nere e la camisa bianca de coton con le manighe curte, …… sù consiglio del direttor senza canottiera o con una maietta bianca sotto .( compreso nella divisa un mokador nero de metter in vita .. che non gavemo mai dovù indossar )
Nel taschin Sandro tigniva un pacchetto de Alfa e questo disturbava l’immagine del locàl , cussì ogni due o tre giorni el direttor ghè dava un pacchetto de Marlboro , credo de tasca sua , ….mì non fumavo per cui …un .zzo .


Subito dopo l’entrata in sevizio , iera nostro compito preparar la senape , vasi de cinque chili che bisognava diluìr con quasi un litro de birra scura …misiando e misiando , spolveravimo i tavoli , mettevimo le tovaie scure, portavimo le oliere e i piatti bassi nelle postazioni dei camerieri , impinivimo i cassettini con le posate , i tovaioi e i sottobiceri.


Zenavimo a turno , una pasta , soliti capuzzi , un tòco de porco in caldaia e mezzo de birra né costava 120 lire …prezzo per il personale .
Me ricordo el costo della zena perchè Sandro mè devi ancora adesso non sò quante monede de venti lire !

Tutto questo doveva esser fatto prima delle 18 , se iera bèl tempo in giardin e se pioveva… in taverna.
Maledetta piova !
Per noi sottoposti , una serata in giardìn iera come metà lavor , se invezze bisognava n’dàr in taverna… diventava pesante !
Perché ?
Perché la cusina iera al livel della strada , quindi del giardìn ,…. invezze la taverna iera un casìn de scalini più sotto con un dislivèl che i clienti superava in modo naturale, specialmente entrando , ma che per noi portatori de piatti dopo qualche ora diventava un calvario.


Quei che stà leggendo e che gà avù l’occasiòn de passar una serata in taverna sé ricorderà che scendendo la scala , sulla sinistra iera un’apertura ad arco chiusa da una tenda verde con a fianco un antico contator de cassa e subito dopo.. el banco con le quattro spine de birra che serviva la sala.


Bòn , drìo quella .zzo de tenda verde iera una salita che portava alle cusine e che mì e Sandro fazzevimo in zò con i vassoi pieni de piatti “Super”o de luganighe coi capuzzi e in sù col carro pien de piatti sporchi .
El turno durava circa fina alle 23 , rare volte a mezzanotte e a dopo aver ripreso le nostre sembianze normali , in jeans e maietta colorada , sé mettevimo su un tavolìn davanti la porta dei spogliatoi che iera praticamente davanti alle cusine .
Quel iera el momento che el capo cogo né portava una birra per’omo e i camerieri vignindo fora né lassava le mance .

Praticamente iera una specie de dividendi , se el camerier iera una brava persona , se el gaveva ciapà un poche de mance e noi ierimo stài bravi ,… el metteva nel boccal predisposto qualche soldìn .
Se invezze el camerier iera cornuto, … da bravo stronzòn nol metteva niente nel boccal e cussì el giorno dopo el gavessi avù problemi per ricever i piatti in comanda !
Un discorso a parte merita Ucio Augustini e la sua banda che i gà sempre messo nel boccal più dindini dei altri e che né fazzeva spanzàr dal rider con le sue “improvvisate” nelle cusine . (anche i componenti della banda iera delle vere mine vaganti !)


Forsi Sergio sé ricorda quella sera dell’altro secolo , quando tutta la compagnia gà bevù un fiume de birra in giardìn con 150 lire a testa , grazie a noi due servi che spinavimo nel buio della taverna e siòr Ucio né gà regalà le fiasche che i clienti ghè mandava sul palco .

Sòn stà longo e noioso ma parlar del Dreher me gà fatto vignìr in mente un bellissimo periodo con amici…quasi incredibili .

Chissà che quel Orso non rispunti dalla profonda bisiacheria …..anche senza Benelli ..sarìa proprio bèl incontrarlo !